Gazeta Dita shkruan se avokat Idajet Beqiri është kërcënuar me jetë. Kjo, pas botimit të një interviste të Shefqet Peçit.
“Ishte një burrë rreth 45 vjeç që më thirri në momentin që po hyja në zyrën e postës. Ktheva kokën dhe bëra disa hapa prapa për ta takuar. Mendova se ishte ndonjë hallexhi nga ata që më kapin përditë për probleme ligjore. Jo. Ky nuk ishte i tillë. E kishte me materialin që DITA po boton prej pesë ditësh. I dhashë dorën siç veproj normalisht dhe vura re se dorës së djathtë të tij i mungonin tre gishtërinj. Ma ktheu me brutalitet: Po ç’ke ti mor maskara me Muharrem Bajraktarin e Sali Berishën? Po unë jam nipi i Muharrem Bajraktarit e të hap barkun… Në këtë moment, nxjerr nga xhepi një thikë e ma drejton. Edhe unë bëra sikur futa dorën në xhep ku mbaj çelësat e makinës. Dhe me qetësi i thashë: Po shkruaj o derëzi në gazetë e mbroji edhe Muharremin, edhe Saliun. Nuk të pengon kush. Po mos u bëj kriminel si yt gjysh…”, thotë Beqiri.
