Deputetja e Partisë Socialiste, Lindita Nikolla komentoi daljen e Presidentin sot për mediet duke thënë se meriton injorimin e plotë lidhur me deklaratat e bëra sot nga ana e tij.
Gjatë një interviste televizive, Nikolla tha se institucioni i Presidentit ka marrë pamje të trishtë për shkak të lëvizjeve dhe deklaratave të Metës.
“Ishte e trishtë. Unë jam ndjerë e ligshtë sesi mundet një njeri që populli shqiptar ka investuar aq shumë duke i dhënë profile në të gjithë karrierën e tij të hershme dhe të vogël politike, duke qenë kryetar i Parlamentit, duke qenë kryeministër, së fundmi edhe President sesi realisht mund të turpërojë edhe standardin më minimal në një njeriu që i është besuar një detyrë e tillë e lartë. Kjo nuk do të thotë që në një kohë të caktuar kur çmenden në detyrë ne duhet të mbetemi peng i një zgjedhjeje. Padyshim, demokracia është reflektim në momente të caktuara dhe veprim për këdo që cënon dhe shkel rëndë atë”, -tha Nikolla.
Deputetja sqaroi se Meta kërkon t’i atashohet heronjve të popullit shqiptarë ndërkohë që sipas saj, ai foli për një komplot ndërkombëtar.
“Sot ishte pamje e trishtë, edhe pse i drejtoi vetës vetën e tretë, Presidenti foli për të gjithë heronjtë e popullit shqiptar duke dashur të atashohet me ta ndërkohë që foli për një komplot ndërkombëtar duke iu kundërvënë ata që janë partnerët strategjikë të Shqipërisë, Bashkimit Europian, Shteteve të Bashkuara të Amerikës. E trishtë, e shëmtuar, meriton injorimin e plotë gjithçka që u përcoll sot nga ai institucion që është institucioni më i lartë i shtetit shqiptar”, -theksoi deputetja e PS-së.
“Është Ilir Meta ai që duhet të reflektojë nga gjithçka që populli e tregoi në 30 qershor. Janë të tjerë ata që duhet të reflektojnë. Pikërisht, Sali Berisha, Lulzim Basha, Monika Kryemadhi dhe Ilir Meta që kërkuan të merrnin peng demokracinë dhe të mohonin të drejtën kushtetuese popullit për të zgjedhje, duke bërë ftesa për dhunë dhe për përplasje gati vëllavrasje në 30 qershor. Populli zgjodhi të votojë. Votoi paqësisht, pa asnjë lloj incidenti dhe këta njerëz janë këta që duhet të reflektojnë për gjithçka që ka ndodhur në 30 qershor. Përsa i takon kryeministrit dhe kësaj mazhorance, patjetër ne jemi të vendosur të shohim përpara për të punuar edhe më përultësisht, për të punuar edhe më shumë në 61 bashkitë që u fituan nga Partia Socialiste për të ofruar cilësi të re shërbimi pa dallime partiake për të gjithë këto komunitete. Nga ana tjetër, ashtu siç kemi vijuar të bëjmë, dora e shtrirë për dialog, për komunikim, për të vijuar rrugën e reformës dhe për të përmbushur të gjitha rekomandimet e ODIHR sa i përket reformës zgjedhore. Kjo është këmbëngulja jonë që ju e quani kokëfortësi, le ta quajmë edhe ashtu, është një këmbëngulje për të mos ceduar asnjë milimetër nga ato që janë parimet e demokracisë shtetformuese dhe që çojnë përpara progresin e Shqipërisë në rrugën e anëtarësimit të Bashkimit Europian”, -tha Nikolla.
Raportin e OSBE/ODHR, Nikolla e konsideroi pozitiv ndërsa argumentoi se ishte zgjedhje e opozitës që nuk mori pjesë në zgjedhje ndaj edhe sipas saj, përgjegjësia bie mbi ta.
/a.r
