Deputeti i Partisë Demokratike, Belind Këlliçi e ka cilësuar paketën fiskale për vitin 2023, një paketë penalitetesh për qytetarët. Këlliçi, nga foltorja e Kuvendit i ka bërë thirrje qeverisë që të kthejë vëmendjen tek qytetarët.
Në seancën e dytë radhazi, ku po diskutohet për projekt-buxhetin 2023, tha se qeveria ka zbrazur vendin me qëllim që të mbushin xhepat e tyre, ndërsa tha se situata ekonomike është e rëndë, dhe rritja e çmimeve i ka bërë qytetarët të mos mund të përballojnë jetesën.
“Miratimi i projekt-buxhetit duhet të ishte hapi i fundi. Dua të di pse anashkalohet grupet e interesit. Problemet po i shtohen vendit dita ditës, në fakt dhe seanca është formale, i keni gati kartonat, a jeni deputetë apo vetëm numra?!
Kjo shfaqje e djeshme e bariut tuaj, me ofendime, ka një motiv që të heqë vëmendjen. Keni zbrazur vendin për të mbushur xhepat tuaj. Ka ardhur koha që kjo qeveri për herë të parë ta ketë vëmendjen tek qytetarët”, u shpreh ai mes të tjerash.
Gjatë fjalës së tij në seancën plenare në Kuvend, Këlliçi u shpreh se duhet të hiqet taksa e qarkullimit për industrinë e ndërtimit, në mënyrë që të ulen çmimet e apartamenteve.
Të hiqet taksa e qarkullimit për industrinë e ndërtimit, ndihmon që çmimet e apartamenteve të ulen, Veliaj e ka rritur 10 herë taksën e ndërtimit, taksë mbi vlerën e shitjes dhe jo kostos, prandaj është e pamundur blerja e një apartamenti. Meqë është dyfishuar buxheti, pse nuk dyfishohen pensionet, paga dhe pensionet.
Çmimet do vazhdojnë të rriten, pensioni juaj do rritet me 1%. Kjo nuk është paketë fiskale, por gjobash. Nuk ndodh në BE që të hartohet një paketë penalitetesh për qytetarët.
/s.f
