Drejtori i Policisë Rrugore, Mit’hat Tola i ka bërë thirrje të gjithë drejtuesve të mjeteve që të kenë kujdes në zonat ku kanë ngrica, të përdorin zinxhirë dhe të reduktojnë shpejtësinë me të cilin lëvizin.
Ai ka bërë të ditur gjithashtu se punonjësit e policisë rrugore janë në gatishmëri të plotë për të dhënë ndihmën e tyre qytetarëve në çdo zonë të vendit.
“Të reduktohet shpejtësia. Të vendosen zinxhirët. Të evitohen parakalimet. Të ecin me marshin e dytë, të evitojnë frenimet. Të jenë shumë të përqendruar deri sa të dalin nga zona e vështirë. Ne kemi kulturë të vogël në drejtimin e mjeteve në Shqipëri. Kemi edhe drejtues mjeti asocialë. Duhet të kemi lirinë tonë dhe të mos cenojmë atë të tjetrit”, tha Tola gjatë një interviste televizive.
Tola u shpreh se punonjësit e policisë rrugore janë në gatishmëri që të ofrojnë ndihmën e tyre, qoftë dhe për vënien e zinxhirëve.
“Patrullat që operojnë në zonat ku dëbora nuk është fenomen i rrallë dinë të ndihmojnë shumë më mirë, të tjerët hasin në vështirësi. Por njohura për fenomene të tilla fillon që në momentin që blen mjetin. Por edhe nëse ka pasur nevojë për ndihmë, policia rrugore është solidarizuar me ta për t’i ndihmuar. Para se të nisen, qytetarët duhet të informohen. Megjithatë policia është në terren për t’i ndihmuar gjithmonë,” u shpreh Tola.
/a.rada
