Avokati dhe analisti politik, Spartak Ngjela, përgjatë një interviste për RTSH-24, ka komentuar lajmin se SPAK i ka dërguar fletëthirrje ish-Kryeministrit, Sali Berisha për të dëshmuar, lidhur me ngjarjen tragjike të 21 Janarit 2011, ku humbën jetën katër protestues.
Ngjela e cilësoi ngjarjen e 21 Janarit si “një turp të madh kombëtar” për Shqipërinë, duke theksuar se në asnjë vend demokratik perëndimor nuk qëllohen protestuesit me automatik nga selia e kryeministrisë.
“Ku ndodh një ngjarje e tillë në Perëndim? Ku ndodh në demokraci? Ku ndodh që të qëllosh protestuesit me automatik nga selia e kryeministrisë? Revolta popullore nuk qëllohet me plumba,”, tha Ngjela.
Llogaridhënia dhe forca e ligjit
Lidhur me qëndrimin e ish-Kryeministrit për t’u paraqitur në SPAK, Ngjela ishte i prerë, duke theksuar se askush nuk është mbi ligjin.
“Nuk e di se ç’do të ndodhë për këtë, por ligji është i qartë. Nëse Berisha refuzon të paraqitet në SPAK, ligji e thotë qartë se merret edhe me forcë të japë dëshminë,”, nënvizoi avokati.
Ai theksoi se të gjithë qytetarët e kanë shpresën te SPAK, jo vetëm për këtë çështje, por edhe për luftën kundër krimit të organizuar, duke kujtuar se SPAK drejtohet nën mbikëqyrjen e aleatëve ndërkombëtarë.
Profilet e larta nën akuzë
Ngjela vuri në dukje ndikimin e Reformës në Drejtësi dhe punën e SPAK-ut, duke përmendur se kurrë më parë në Shqipëri nuk ka ndodhur që profile të larta, duke përfshirë zëvendëskryeministra, ministra dhe kryetarë bashkish, të jenë nën akuza.
“Të gjitha elitat dhe qytetarët këtë kanë pritur. Ajo ditë (21 Janari) ishte një gjëmë e madhe për Shqipërinë. Kjo duhet zbardhur,” – përfundoi Ngjela.
