Një person është ekzekutuar me armë zjarri mesditën e sotme në Prishtinë. Policia e Kosovës me anë të një njoftimi për media ka konfirmuar vrasjen e një personi në lagjen “Dardania”.
Sipas policisë, i dyshuari dhe viktima kanë qenë brenda të njëjtës makinë dhe i dyshuari ka qëlluar me armë zjarri drejt viktimës, i cili për pasojë ka humbur jetën.
Deri më tani policia ka arritur të identifikojë autorin e dyshuar, që mendohet të jetë një shtetas i huaj, i cili është larguar menjëherë nga vendi i ngjarjes.
Sipas dëshmitarëve krisma të armës janë dëgjuar 5 herë.
Agron Borovci nga Drejtoria Rajonale e Prishtinës, ka thënë se dyshimet e para janë se vrasësi dhe viktima kanë qenë në të njëjtën veturë, dhe se dyshuari nga mbrapa ka shtënë me armë zjarri në viktimën.
Sipas tij, i dyshuari është identifikuar dhe policia është në kërkim.
“Rreth orës 12:00 policia ka marrë informatën për rastin e ndodhur në rrugën ‘Bashkim Fehmiu’ në Prishtinë, dhe menjëherë ka dalë në vendin e ngjarjes”.
“Nga këqyrja e vendit të ngjarjes është konstatuar se bëhet fjalë për vrasje dhe ngritur dyshimi se i dyshuari dhe viktima kanë qenë brenda të njëjtës veturë dhe i dyshuari nga mbrapa ka shtënë me armë zjarri në viktimën, mashkull i cili për pasojë ka humbur jetën”.
“Në vendin e ngjarjes janë ftuar edhe specialistët për hetimin e rasteve të vrasjeve si dhe njësitet e specializuara për ekzaminim të vend ngjarjes”.
Në bashkëpunim me prokurorin e shtetit ka nisur një hetim me qëllim të sqarimit dhe ndriçimit të rrethanave dhe motiveve që kanë sjellë deri te ky rast tragjik.
Aktualisht policia ka intensifikuar veprimet e saj për të zbuluar vendndodhjen e tij të dyshuarit me qëllim kapjen e tij.”, ka thënë Borovci.
/a.r
