Ngjarja në Laç, flet deputeti Prenga: Skenar për të njollosur emrin tim
Deputeti Armando Prenga ka dhënë versionin e tij për ngjarjen e ndodhur dy ditë më parë në qytetin e Laçit ku mbetën të plagosur 7 persona. Avokati i tij ka lexuar për mediat një letër, ku deputeti sqaron ngjarjen e ndërsa thekson se është kërcënuar me thikë.
Prenga thotë se mbrëmjen e së premtes një makinë i ka prerë rrugën dhe është kërcënuar me thikë nga Gjok Cali. Para rrezikut për jetën, ai pranon se ka nxjerrë pistoletën dhe ka qëlluar në ajër. “Personi në fjalë ka ikur me vrap dhe ka hedhur thikën. I thashë vëllait të bëjë denoncimin dhe vetë shkova në lokalin e tij në Patok. Aty nuk e gjeta dhe shkova në një lokal në Kurbin, ku hynë disa persona dhe nisi një përleshje. Nga kjo përleshje janë plagosur rëndë nga të dyja palët”, thuhet në deklaratën e deputetit socialist.
Prenga këmbëngul se kjo ngjarje është dashakeqësi ndaj tij dhe se ai nuk ka dijeni. Ai shton se thjesht ka shoqëruar në spital vëllain që iu plagos dhe në Tiranë ka dhënë dëshminë e tij. “Kjo është e vërteta. Unë nuk di detaje nga përleshja sepse ngjarja ka ndodhur në errësirë. Arma ime nuk është përdorur në komisariat”, lexoi më tej avokati Rusi.
Prenga shtoi se “shteti dhe opozita po i hedhin benzinë zjarrit”. Ai thotë se “është e vërtetë që ka një konflikt për pronën, por këtë problem familja Cali e ka me shtetin dhe jo me familjen time. Ky është një skenar për të njollosur emrin tim”.
