Koalicioni PAN nuk do t’i përmbahet zotimit të dhënë javën e shkuar për pjesëmarrje në seancën konstitutive të Kuvendit, veprim që e kishte kushtëzuar me një takim konsultativ në të cilin do të vendosej që vazhdimi i seancës të organizohej për të enjten ose të premten.
Kushti është përmbushur, por ky koalicion tani do kohë shtesë.
Burime të “Kohës Ditore” kanë thënë të martën se përfaqësuesit e të tria partive që përbëjnë koalicionin fitues relativ të zgjedhjeve të parakohshme do të kërkojnë në takimin konsultativ të së mërkurës që vazhdimi i seancës të thirret për javën e ardhshme.
“Përfaqësuesit e PDK-së, AAK-së dhe Nismës do të marrin pjesë në takimin konsultativ. Ka një përcaktim brenda koalicionit që të shkohet në seancë, por kohën e mbajtjes së saj është vendosur ta propozojë PDK-ja, meqë kryetarin e vet do ta kandidojë për kryeparlamentar”, ka thënë ky burim brenda koalicionit PAN.
