Kreu i Komisionit Qendror të Zgjedhjeve (KQZ), Ilirjan Celibashi, ka shpjeguar disa nga arsyet që qëndrojnë pas refuzimeve të aplikimeve për regjistrimin e emigrantëve për zgjedhjet e 11 majit.
Në një intervistë në emisionin “Quo Vadis” në Vizion Plus, të moderatores Pranvera Borakaj, Celibashi theksoi se një pjesë e madhe e refuzimeve vijnë për shkak të gabimeve gjatë ngarkimit të dokumenteve, duke përmendur shembuj si ngarkimi i fotove të paqarta ose të pavlefshme.
Gjatë bisedës, Celibashi bëri të ditur se KQZ po punon për të përmirësuar informacionin dhe procesin e regjistrimit, duke ofruar transparencë për çdo hap të tij.
Pjesë nga intervista:
Borakaj: Siç ka një kërkesë të lartë për t’u regjistruar, ka dhe një numër shumë të lartë refuzimesh, gati 34%. Si e adreson KQZ këtë problem?
Celibashi: Numri rreth 33-34 mijë refuzimesh i korrespondon kërkesave. Ka zgjedhës që kanë aplikuar 2-3 herë dhe kanë gabuar në të gjitha rastet. Domethënë, i është refuzuar më shumë se një aplikim. Numri i votuesve që u është refuzuar kërkesa për t’u regjistruar është rreth 26 mijë. Janë 33 mijë aplikime të refuzuara, por individët që janë refuzuar janë 26 mijë. Do bëjmë një korrigjim në pjesën informative për të saktësuar të dhënat. Ka informacion të bollshëm. Mund të kuptohet nga cilat shtete janë bërë aplikimet, cilat shtete kanë numrin më të madh të aplikimeve të pranuara ose refuzuara, gjinia, grupmosha etj. Çdokush mund të gjejë atë që kërkon në lidhje me procesin e regjistrimit.
Borakaj: Çfarë gabimesh bëjnë shqiptarët që u refuzohet kërkesa?
Celibashi: Nuk po listoj ata të cilët duket sikur me dashje i bëjnë këto gabime. Sepse nëse të kërkohet një dokument për të provuar adresën dhe nuk ngarkon asnjë dokument, por ngarkon një foto ku ke dal në rrugë duke bërë pazarin. Ke ngarkuar foton e tabelës, emrin e rrugës ku banon dhe foto të tjera të çuditshme. Pjesa tjetër kryesisht gabon në llojin e dokumentit që ngarkojnë dhe saktësinë apo qartësinë e ngarkimit e dokumentit.
