Mësuesi i matematikes në shkollën 9-vjeçare në Kashar, Hasan Martani ka dalë sot para gjykatës për t’u përballur me akuzat për ngacmim seksual ndaj nxënëses 14-vjeçare. Mësuesi u shpreh para trupit gjykatës se nuk ka ngacmuar askënd, ndërsa e konsideroi arrestimin e tij të paligjshëm.
Prokuroria e Tiranës ka dorëzuar dje kërkesën në gjykatë për mësuesin Hasan Martani, ndërsa kërkon masën ‘arrest me burg’.
Mësuesi i matematikes në shkollën 9-vjeçare në Kashar, Hasan Martani u arrestua dy ditë më parë pasi dyshohet se ka abuzuar seksualisht me një nxënëse të klasës së shtatë në ambientet e shkollës.
Kallëzimi në polici është bërë nga prindërit e vajzës së abuzuar. Në prani të psikologut, vajza ka treguar se mësuesi i Matematikes që ishte dhe mësuesi kujdestar i saj e mbante në klasë dhe kryente veprime të turpshme me të. Ajo ka rrëfyer më tej, duke shtuar se mësuesi e puthte dhe e prekte në zona intime. Sipas saj veprimet bëheshin edhe në korridore apo ambiente të tjera të shkollës.
Ndërkohë, gjatë marrjes në pyetje, mësuesi ka mohuar kategorikisht akuzat që rëndojnë ndaj tij. Ai pohoi se me vajzën ka pasur një raport korrekt mësues-nxënës.
Më herët, nëna e vajzës dëshmoi se si mësoi nga mesazhet në ‘Facebook’ se vajza e saj abuzohej nga mësuesi në ambientet e shkollës.
“Vajza ime e denoncoi. Nuk ka pasur shqetësim nga mësuesit e tjerë. Edhe për këtë mësues kam pasur respekt se ishte autoritar. Jam befasuar kur i pashë me sytë e mi mesazhet në ‘Facebook’. M’u shemb bota. Vajza është ekselente. Si ngjarje kam një javë që e di. Kam dorëzuar provat. Nuk duhet vetëm pezullimi, por kërkoj të dënohet. Ai që dyshonim se ishte i rrezikshëm iku. Kam qenë e shqetësuar se vajza si tip ka qenë edhe e mbyllur dhe mbyllja shkoi edhe më tej”, thotë ajo./a.ç
