Mediat e huaja zbulojnë të tjera detaje nga draft-dokumenti i Bashkimit Evropian që planifikon sanksione edhe ndaj kreut të kishës ortodokse ruse, Patriarkut Kirill.
Ai është një aleat i vjetër i Putinit, i cili ka dhënë bekimin e tij për pushtimin rus në Ukrainë.
Siç shkruan “The Guardian“, që thotë se ka parë dokumentin e hartuar nga BE, Kirill, i cili përdori një predikim për të mbështetur luftën në Ukrainë, tani përballet me përfshirjen në listën e sanksioneve, ku tashmë janë më shumë se 1,000 rusë.
Ai është një nga 57 personat që do të përballen me ndalim udhëtimi në BE dhe ngrirje të aseteve sipas sanksioneve të reja që po diskutohen nga shtetet anëtare të unionit, per paketen e gjashte te tyre.
Zyrtarët e BE-së po synojnë gjithashtu edhe anëtarët e familjes së vogël të sekretarit të shtypit të Vladimir Putin, Dmitry Peskov.
Ky i fundit u sanksionua edhe në paketën e mëparshme me sanksione të BE.
Bashkëshortja e Peskov, Tatiana Navka, do t’i shtohej listës së BE edhe për shkak të bashkëpronësisë së saj në disa prona në Krime, e cila u aneksua nga Rusia në 2014, sipas BE-së.
Djali i tij, Nikolay Peskov, 31 vjeç, thuhet në draftin e BE, përdor paratë e babait të tij, ndërsa Elizaveta Peskova, 24 vjeç, thuhet se ka fituar “pozicione fitimprurëse dhe ka bërë jetë luksoze falë lidhjeve të babait të saj”.
Një ditë pas pushtimit rus, Peskova postoi “Jo luftës” në llogarinë e saj në Instagram, sipas mediave ruse. Postimi u hoq më vonë.
Në listë pritet t’i shtohet edhe Marina Mordashova, gruaja e njeriut më të pasur të Rusisë, Alexei Mordashov, sepse thuhet se ajo përfiton nga pasuritë e të shoqit.
Alexei është një aksioner i Severstal, kompania më e madhe ruse e çelikut.
g.kosovari
