Sipas studiuesve, virusi agresiv SARS-CoV-2 sulmon jo vetëm mushkëritë, por edhe zemrën, nervat, trurin, enët e gjakut, veshkat dhe lëkurën.
COVID-19 prek në radhë të parë mushkëritë dhe traktin respirator dhe shoqërohet me vështirësi në frymëmarrje, kollë të thatë, marrje fryme dhe me pneumoni. Por tani mjekët kanë vënë re në raste të shumta që virusi i ri SARS-CoV-2 mund të prekë rëndë dhe organe të tjera si zemrën, enët e gjakut, nervat, trurin, veshkat dhe lëkurën.
Zemra
Një numër studimesh dhe artikujsh nga SHBA, Kina dhe Italia, kanë arritur në përfundimin që SARS-CoV-2 sulmon dhe zemrën. Fjala nuk është vetëm për pacientë që vuajnë nga sëmundje koronare apo nga tensioni i lartë, por për raste pacientësh që para se të infektoheshin me Coronën ishin të shëndoshë dhe tek të cilët janë konstatuar raste miokarditi, inflamacion i muskujve të zemrës.
Mushkëritë
Jo vetëm prej COVID-19 por edhe në raste të tjera infeksionesh të mushkërisë në të krijohen hije opake në mushkëri, të cilat mund të shkaktojnë fibroza. Për shkak të tyre dëmtohet funksioni i mushkërive dhe furnizimi i gjakut me oksigjen. Fibroza e mushkërive është e pashërueshme, por nëse konstatohet me kohë ajo mund të ngadalësohen.
Skaner i mushkërisë me Corona
Enët e gjakut
Gjatë autopsisë së pacientëve të vdekur me COVID-19, patologët e Spitalit Universitar të Cyrihut zbuluan se tek disa prej tyre ishte infektuar e gjithë shtresa qelizore e enëve të gjakut dhe e enëve limfatike (endoteli) të organeve të ndryshme.
Studiuesit arritën në përfundimin se virusi i ri SARS-CoV-2 çon në inflamacion të përgjithshëm të endotelit përmes receptorëve ACE2. Kjo mund të çojë në çrregullime të rënda të mikrocirkulimit që dëmtojnë zemrën dhe shkaktojnë emboli pulmonare dhe okluzione vaskulare në tru dhe traktin tretës. Si rezultat ndodh insuficensë e njëkohëshme e shumë organeve, e cila mund të çojë edhe në vdekje.
Truri
Që në pararendësit e e virusit Corona MERS dhe SARS është vënë re që këto viruse depërtojnë përmes nervave deri në tru. Në rastin e një pacienti të infektuar me virusin Corona në Japoni i cili pati krizë epileptike, u diagnostikua edhe meningjit i shkaktuar nga virusi Corona që kishte depërtuar në sistemin nervor qendror.
Studiues nga Japonia dhe Kina mendojnë se virusi mund të depërtojë tek disa pacientë në tru dhe të dëmtojë qendrën e frymëmarrjes. Kjo shpjegon pse disa pacientë të moshuar të infektuar me COVID-19 ndonjëherë ndalojnë frymëmarrjen pa pasur më parë probleme masive me frymëmarrjen për shkak të infeksionit të mushkërive. Ende është e paqartë nëse SARS-CoV-2 shkakton gjithashtu apo favorizon hemoragjitë cerebrale.
Veshkat
Tek pacientë me COVID-19 që vuajnë prej infeksioneve të mushkrive ka shpesh dëmtime të veshkave dhe raste të insuficences së veshkave. Shkak është një ilaç që u jepet pacientëve për shkak se u mbushen mushkëritë me ujë. Ky ilaç pakëson sasinë e lëngjeve në trup, por nga ana tjetër ndikon që veshkat të mos furnizohen sa duhet me ujë dhe të mos e plotësojnë më funksionin e tyre.
Tek rreth 30 përqind e këtyre pacientëve funksioni i veshkave kufizohet aq shumë sa që ata kanë nevojë për dializë. Deri tani ende nuk mund të thuhet nëse veshkat shërohen pas shërimit prej SARS-Cov-2 apo nëse ky virus shkakton dëme afatgjatë të veshkave.
Lëkura
Coronavirus SARS CoV-2 duket se lë shenja të dukshme edhe në lëkurë. Nga disa vende është raportuar se pacientët me Covid-19 kanë pasur edhe ndryshime në lëkurë. Lezione të vogla dermatologjike në këmbë janë vënë re veçanërisht tek fëmijët dhe adoleshentët. Këto njolla vjollcë janë të ngjashme me ato të fruthit apo të lisë së dhenve. Disa herë janë vënë re edhe skuqje në pjesë të ndryshme trupit.
Ndryshimet dhe njollat mavi të lëkurës mund të jenë shkaktuar prej një çrregullimi të koagulimit të gjakut, i cili gjithashtu mund të shkaktohet nga virusi Corona. /DW
g.kosovari
