Zbardhen disa nga kërkesat që Rusia i ka kërkuar SHBA-së lidhur me fundin e luftës në Ukrainë. Gjatë takimit të Vladimir Putin me Donald Trump në Alaska, takimi i parë i këtij niveli që nga nisja e konfliktit në vitin 2022, thuhet se Rusia do të hiqte dorë nga pjesë të vogla të Ukrainës së pushtuar dhe Kievi do të lëshonte pjesë të tokës së saj lindore.
Mediat amerikane thonë se sipas marrëveshjes së propozuar ruse, Kievi do të tërhiqej plotësisht nga rajonet lindore të Donetskut dhe Luhanskut në këmbim të një premtimi rus për të ngrirë vijat e frontit në rajonet jugore të Khersonit dhe Zaporizhzhisë.
Gjithashtu Putin ka kërkuar të paktën njohjen formale të sovranitetit rus mbi Krimenë, të cilën Moska e sekuestroi nga Ukraina në vitin 2014. Nuk është e qartë nëse kjo do të thotë njohje nga qeveria amerikane apo nga të gjitha fuqitë perëndimore dhe Ukraina. Kievi dhe aleatët e tij evropianë e refuzojnë njohjen formale të sundimit të Moskës në gadishull.
Burimet thanë se Putin priste gjithashtu heqjen e të paktën disa prej sanksioneve ndaj Rusisë, por pa specifikuar nga SHBA apo Evropa.
Një tjetër pikë diskutimi ishte edhe se Ukraina do të ndalohej të bashkohej me aleancën ushtarake të NATO-s, megjithëse Putin ishte i hapur që Ukraina të merrte një lloj garancie sigurie.
Edhe pse samiti dështoi të siguronte armëpushimin, Trump tha se palët kishin “rënë dakord kryesisht”.
“Mendoj se jemi shumë afër një marrëveshjeje. Ukraina duhet të bjerë dakord me të. Ndoshta do të thonë ‘jo’”, tha ai.
Ndërkohë, presidenti ukrainas Volodymyr Zelensky ka refuzuar çdo tërheqje territoriale, duke theksuar se Donetsku e Luhansku mbeten thelbësore për mbrojtjen e vendit.
“Ne shohim që Rusia kundërshton thirrje të shumta për armëpushim dhe ende nuk ka përcaktuar se kur do t’i ndalë vrasjet. Kjo e ndërlikon situatën”, tha presidenti ukrainas në një deklaratë për X.
Të hënën, Zelensky do të udhëtojë për në Uashington, ku Presidenti i SHBA-së Donald Trump ka thënë se do t’i kërkojë udhëheqësit ukrainas të bjerë dakord për një marrëveshje paqeje.
