“Nga malet e thepisura, te qytetet e lashta”, Rama ndan pamjet: Shqipëria turistike, gati për t’u zbuluar gjatë 2024

Viti 2023 u mbyll me mbi 10 milionë turistë për Shqipërinë, një shifër kjo rekord në historinë e turizmit për vendin tonë.

Por ambiciet e qeverisë shqiptare janë që ky numër, jo vetëm të arrihet sërish gjatë vitit 2024, por edhe të tejkalohet.

Kështu, sezoni turistik 2024 është premtues dhe pritshmëritë janë të mëdha, e për këtë arsye edhe Ministria e Turizmit ka nisur nga puna për të përmbushur objektivat.

Kryeministri Edi Rama, përmes një postimi në rrjetet sociale, shkruan se Shqipëria turistike është gati për t’u zbuluar gjatë vitit 2024, duke ofruar të gjitha llojet e turizmit.

“Shqipëria turistike është gati për t’u zbuluar gjatë gjithë 2024-ës me të gjitha bukuritë e saj: nga malet e thepisura që shohin ujërat e bruzta të deteve, qytetet e lashta, e më në thellësi akoma, traditat sa të vjetra aq të gjalla që janë shpirti i vërtetë i saj dhe përvojat e bukura të gjithë udhëtarëve që një vendi dinë t’i rrokin shpirtin”, shkruan Rama.

Qeveria synon që Shqipëria ta shtrijë turizmin gjatë gjithë vitit.

/a.r