Dy të rinj nga Peqini u qëlluan me armë zjarri mbrëmjen e sotme në qytetin e Peqinit, ku për pasojë 1 mbeti i vdekur dhe tjetri u plagos. Ngjarja ndodhi në aksin rrugor Elbasan-Peqin, në fshatin Përparim. Nga atentati për pasojë mbeti i vdekur 26-vjeçari Andi Zylyfi, dhe u plagos shoku i tij Ardit Uruçi, 23 vjeç.
Sipas mediave informative, ka dyshime se dy të rinjtë janë nxjerrë në pritë, pasi ishin brenda një makinë, pranë një lokali. Referuar burimeve policore raportohet se atentati ka qenë i mirëorganizuar, ndërsa si pistë për policinë mund të jetë edhe larja e hesapeve midis bandave rivale.
Mësohet se djali i hallës së Andi Zylyfit është vrarë vitin e kaluar në këtë aks rrugor, ndërkohë që policia po heton nëse ngjarjet kanë lidhje me njëra-tjetrën.
Viktima kishte vetëm pak kohë që ishte kthyer në Shqipëri, ndërsa policia po heton edhe për faktin nëse ngjarja ka lidhje me detyrën e babait të tij, i cili ishte punonjës në Burgun e Peqinit.
