“Një urë komunikimi për të afruar bizneset me individët e papunë dhe njohjen e këtyre të fundit me qindra mundësi punësimi”, e cilëson Zëvendës Ministrja e Financave, Dajna Sorensen panairin kombëtar të punës, të çelur në sheshin Skënderbej të Tiranës.
“Në këtë panair kemi 72 biznese pjesëmarrëse që prezantojnë mundësitë e punësimit për qytetarët shqiptarë. Vendet e lira të punës mbulojnë fushat si menaxherë shitjesh, ekonomistë, asistentë, biznese që kanë të bëjnë me turizmin, teknologjinë e informacionit, kompani të fasonit, etj. Këto biznese sjellin rreth 3200 vende të lira pune”, tha Sorensen në një speciale të përgatitur nga ERTV.
Në këtë panair të organizuar nga Ministria e Financave dhe Ekonomisë, nuk janë vetëm bizneset private ato që ofrojnë mundësi punësimi. ERTV u ndal gjatë panairit edhe në stendën e Forcave të Armatosura të Shqipërisë, ku ofrohen 200 vende të lira pune.
“Forcat e Armatosura ofrojnë rreth 200 vende pune për ata të rinj që kanë mbaruar shkollën e mesme si ushtarë aktivë në forcat e armatosura. Gjithashtu kemi edhe vende pune për ata që kanë mbaruar studimet pasuniversitare, minimalisht bachelor, u jepet mundësia për të kryer kursin pasuniversitar në struktura tona. Të gjitha shërbimet tona dhe trajnimet, janë falas. Studentët ekselentë që mbarojnë me nota të larta, ne kemi bashkëpunime me vendet aleate si Italia, Turqia, Greqia, Kosova, Amerika, Anglia, të cilët na dërgojnë kuota të veçanta për studentët, që të studiojnë atje dhe të përgatiten si oficerë dhe kur përfundojnë studimet thehen me dy diploma”, tha përfaqësuesi i FA.
Në anë tjetër, Drejtoresha e Shërbimit Kombëtar të Punësimit, Elira Caushi, tha për ERTV se kohët e fundit është rritur bashkëpunimi i zyrave të punës me qendrat e formimit profesional për të adresuar problematikat e mungesës së punonjësve të kualifikuar për bizneset. Përmes programeve të veçanta të trajnimit për punonjësit, Shërbimi Kombëtar i Punësimit i përgjigjet bizneseve private, mbi nevojat që ata kanë për punonjës me aftësi dhe njohuri specifike.
/a.rada
