SHBA-të kanë përdorur një pjesë të arsenalit të tyre më të avancuar ushtarak në sulmet ndaj Iranit, duke mobilizuar forcën më të madhe në Lindjen e Mesme në dekada.
Pas paralajmërimit të presidentit amerikan Donald Trump se SHBA-të ishin “të përgatitura dhe të ngarkuara”, Uashingtoni ndërmori sulme të drejtpërdrejta në bashkërendim me Izraelin. Sipas njoftimeve, operacioni çoi në vrasjen e udhëheqësit suprem të Iranit.
Komanda Qendrore e SHBA-së, (CENTCOM), publikoi listën e armëve të përdorura deri tani në përballjen me Iranin.
Arsenali i armëve të përdorura:
Bombarduesit e fshehtë B-2 Spirit, avionë strategjikë të padukshëm për radarët, të aftë për të goditur objektiva thellë në territor armik.
Raketa sulmi tokësor Tomahawk, të lëshuara nga anijet luftarake amerikane. Një prej tyre u qëllua nga shkatërruesi USS Thomas Hudner.
Dronë me një drejtim LUCAS, mjete ajrore pa pilot të përdorura për goditje precize.
Sistemet e mbrojtjes ajrore Patriot dhe THAAD, të dislokuara për të neutralizuar çdo kundërpërgjigje me raketa nga Irani.
Anije luftarake të klasit Arleigh Burke, të pajisura me sisteme të avancuara raketore.
Para nisjes së sulmeve, SHBA përqendroi në Lindjen e Mesme bombardues strategjikë, anije me raketa të telekomanduara dhe sisteme të mbrojtjes ajrore, në atë që konsiderohet si një nga dislokimet më të fuqishme ushtarake amerikane në rajon në dekadat e fundit.
Operacioni shënon një përshkallëzim të fortë të përplasjes SHBA-Iran, me përdorimin e teknologjisë më të avancuar ushtarake në dispozicion të Pentagonit.
