Kuvendi do të vijojë veprimtarinë edhe për pesë javë të tjera për të mbyllur punët e lëna pas, para se të shpërndahet në fillim të korrikut duke ulur edhe siparin e kësaj legjislature.
Krahas projektligjeve të mbartura apo akteve normative, pjesë të shqyrtimit janë edhe raportet vjetore të institucioneve të pavarura, që do të sjellë një ballafaqim mes deputetëve dhe kreut të SPAK Altin Dumanit.
Deputetët do të rikthehen në sallën e Kuvendit këtë të enjte, për të vijuar aty ku e lanë.
Seancat plenare të legjislaturës aktuale do të vijojnë edhe për pak javë pasi veprimtaria e Kuvendit aktual është parashikuar të mbyllet në datën 9 korrik. Deri atëherë, ka disa detyra për të mbyllur.
Puna kryesore është shqyrtimi i raporteve vjetore të institucioneve të pavarura, e cila duhet të kishte filluar që në muajin prill, por fushata për parlamentaret e 11 majit, e la pas dore këtë detyrë.
Tanimë, deputetët do të duhet të shqyrtojnë raportimet vjetore të institucioneve të pavarura, dhe të miratojë rezolutat përkatëse. Një prej tyre është edhe SPAK, drejtuesi i të cilës është vënë veçanërisht nën akuza të opozitës, sa i përket zgjedhjeve të fundit.
Kjo kërkesë e demokratëve pak ditë përpara zgjedhjeve u plotësua nga qeveria me akt normativ, i cili është depozituar për miratim në Kuvend nga ana e Këshillit të Ministrave, ku referuar parashikimeve ligjore, do të duhet të miratohet nga ana e deputetëve që të ruaj vlerën juridike.
Dhe me këto akte Kuvendi duket se do të mbyll veprimtarinë e tij ligjvënëse, ndërsa në sallë, do të mund të përplasen mendimet deri në 9 korrik.
