Kryeministri i Izraelit, Benjamin Netanyahu, deklaroi se Lindja e Mesme ka ndryshuar “përtej çdo njohjeje”, duke theksuar se situata gjeopolitike në rajon ka pësuar transformime të thella si pasojë e zhvillimeve të fundit.
Netanyahu zbuloi se Donald Trump i kishte kërkuar Izraelit të mos sulmonte objektet iraniane të fushave të gazit dhe se Izraeli kishte vepruar i vetëm në sulmet këtë javë që shkaktuan një përshkallëzim të konfliktit dhe rritje të çmimeve globale të energjisë.
“Bashkëpunimi i madh mes meje dhe mikut tim të mirë Trump është i paprecedentë,” u shpreh Netanyahu.
Netanyahu u shpreh se Izraeli është “më i fortë se kurrë më parë”, ndërsa e përshkroi Iranin si “më të dobët se kurrë”.
Duke folur për marrëdhëniet me Shtetet e Bashkuara, Netanyahu theksoi një nivel të lartë bashkëpunimi, të cilin e cilësoi si historik.
“Kemi sjellë mikun tonë, SHBA-në, në një bashkëpunim që nuk është parë kurrë më parë në histori,” tha ai.
Sa i përket kohëzgjatjes së konfliktit, kryeministri izraelit deklaroi se lufta do të zgjasë “aq sa të jetë e nevojshme”.
Ai shtoi se ende ka punë për t’u bërë dhe se operacionet do të vazhdojnë.
Megjithatë, Netanyahu dha edhe një sinjal se përfundimi i konfliktit mund të vijë më shpejt nga sa pritet. “Do të përfundojë shumë më shpejt sesa mendojnë njerëzit,” tha ai.
“Objektivat tona janë tre. Një , heqja e kërcënimit bërthamor. Së dyti , heqja e kërcënimit të raketave balistike dhe heqja e të dyja këtyre kërcënimeve përpara se ato të varrosen thellë nën tokë dhe të bëhen imune ndaj sulmeve ajrore. Dhe së treti , kjo do të thotë krijimi i kushteve që populli iranian të kuptojë lirinë e tij, të kontrollojë fatin e tij.”-përfundoi Netanyahu.
