Kryeministri Edi Rama flet për luftën kundër kultivimit të kanabisit, ndërsa thotë se në fund të vitit do të jetë vetëm një kujtim.
Në një intervistë të dhënë ditën e sotme për ‘France 24’, duke folur për emisionin “Talking Europe”, ai tha se “Ka një kthesë në formë për kanabisin. Ne kemi pasur një ulje dramatike, dhe kam besim se në fund të vitit kultivimi i kanabisit ka për të qenë histori”.
I pyetur se si do të zëvendësohet humbja financiare që sillte kanabisi, ai deklaroi se vendi nuk është aq i varfër, duke u ndalur në mbështetjen e dhënë nga emigrantët.
“Nuk është se jemi në një vend që po vdes urie, ne jemi të varfër sa vendet e tjera të rajonit. Ekonomia po rritet, ne jemi të bindur që mund të kalojmë 5 % vitet e ardhshme. Këtë vit kemi pasur edhe shumë mbështetje nga emigrantët nga jashtë. Shqiptarët janë të varfër por jo aq të varfër saç mund të mendojë dikush duke parë shifrat”, deklaroi Rama.
Duke folur për reformën në drejtësi dhe procesin e Vettingut, sqaroi se gjysma e shqiptarëve janë kushërinj dhe kur nuk janë ndihen të tillë, ndaj shtoi se kishte nevojë për gjyqtarë dhe prokurorë që të mos kishin lidhje.
I pyetur lidhur me aspiratën e Shqipërisë për t’u integruar drejt Bashkimit Europian dhe hapjen e negociatave, ai tha se pritet që bisedat me BE të nisin me këtë vit.
Lidhur me situatën në BE, deklaroi se ka një ndjesi sikur gjërat janë prishur, pavarësisht se ka pasur shumë paqe për shumë breza.
“Në Ballkan ne jemi optimistë sepse ne e kemi parë luftën me sy dhe e dimë se çfarë do të thotë të kesh luftë. Për disa Europa është thjeshtë financa. Ndërsa për ne është projekti më i qëndrueshëm i paqes. Ne po jetojmë tani kohën tonë më të mirë dhe kjo prej BE-së”, tha Edi Rama.
Ai deklaroi se BE është në fakt ajo që e mban Shqipërinë për sa i përket frymëzimit.
“Nëse BE do të largohet nga ëndrra që ne kemi sigurisht që do të shohim alternativa të tjera, çfarë do të dalin. Mund të ndodhe nëse BE është thjesht taktikë”, deklaroi Kryeministri.
/b.d
