Presidenti amerikan Donald Trump, pritet të takohet ditën e sotme me Kryeministrin e Kosovës, Avdullah Hoti dhe Presidentin e Serbisë, Aleksandër Vuçiç.
Lajmi është konfirmuar nga Shtëpia e Bardhë, nëpërmjet një njoftimi të bërë mbrëmjen e së enjtes.
Në të thuhet do të nënshkruhet një dokument i rëndësishëm, por nuk përcaktohet se për çfarë bëhet fjalë.
Pala serbe tha se kërkesa për njohjen e ndërsjellë ishte shtruar si një nga pikat e diskutimeve të ndërmjetësuara nga Këshilltari për Sigurinë Kombëtare, Robert O’Brien dhe ambasadori Richard Grenell, i dërguar i posaçëm i presidentit Donald Trump për bisedimet ndërmjet të dyja vendeve.
Pas takimit të djeshëm, Vuçic tha se, “Një prej pikave ishte për njohjen e ndërsjellë. Unë e refuzova. Nuk është asgjë e re sepse kjo është politika amerikane, vetëm se ne thamë që ajo pikë nuk duhet të jetë në dokumentin për stabilizimin ekonomik. Nga kabineti i Trumpit u treguan “të drejtë” dhe na dëgjuan. Në dokumentet tjera kjo pikë nuk është më”.
Kryeministri i Kosovës, Avdullah Hoti, tha ditën e djeshme se gjatë së premtes pritet të prezantohet marrëveshja për temat ekonomike, për të cilat i diskutua të enjten në Shtëpinë e Bardhë.
“Nesër presim që të finalizojmë të gjithë këtë angazhim që kemi pasur prej kohësh dhe diskutimet që patëm sot”, tha kryeministri Hoti.
Gjatë së enjtes, Kosova dhe Serbia u ulën për herë të parë në bisedë në Shtëpinë e Bardhë, në një nivel të lartë të udhëhequr nga Shtetet e Bashkuara të Amerikës.
/a.r
