Kryetari i Grupit Parlamentar i Lëvizjes Socialiste për Integrim, Petrit Vasili, ka reaguar sërish lidhur me atë që opozita e cilëson “falsifikim të Kodit të Procedurës Penale, lidhur me nenin 491 për ekstradimet”.
Pas bashkëbisedimit me gazetarët të kryetarit dhe nënkryetares në Komisionin e Ligjeve, Ulsi Manja dhe Vasilika Hysi, Vasili ka deklaruar se “ata gënjyen”.
Ai tha se manipulimi është i dukshëm dhe se prokuroria duhet të vihet në lëvizje.
“Manja dhe Hysi u përpoqën t’i gjejnë alibinë mashtrimit të radhës. Të dy gënjeshtarët, të pacipë, treguan qytetarëve që neni 491 ishte votuar duke thënë se ishin dakord. Ju e patë, se nuk e fshihnin dot se të njëjtin procesverbal kishim dhe ne në dorë. Ndryshimi nuk u tha, nuk u verbalizua, e shndërroi komunikimin zyrtar në lojë email-esh, e të gjitha mjetesh tjera informale të komunikimit.
Dëgjuam dhe gënjeshtrën e Ulsi Manjës, që është gati të shkatërrojë edhe reformën në drejtësi. Kërkuan të fusnin përgjuesit deri në krevatet e shqiptarëve, kam luftuar kur isha ministër drejtësie kundër këtyre.
Manipulimi është i dukshëm për të tërë. Dua të di ç’bën prokuroria kur manipulimi është sheshit. Vazhdon e mbyll gojën. Nuk lëviz as gishtin kur dalin e flasin mashtruesit aty. Dokumentet janë kaq të qarta për të kuptuar që manipulimi është aty,” tha Vasili./a.m.
