Një ditë pas arrestimit në Gjirokastër të Eduart Budinit, personi që kërcënoi me armë dhe grabiti një taksist në Tiranë, kanë reaguar prindërit e 30-vjeçarit.
Ata rrëfejnë se djali i tyre e ka kryer grabitjen nga dëshpërimi, për shkak të gjendjes së vështirë ekonomike.
Në një prononcim për “News 24”, Refit dhe Violeta Budini deklaruan se djali nuk u ka hapur kurrë probleme më parë. Ata thonë se ai ndodhej në një moment të vështirë divorci dhe kishte shumë borxhe e një kredi të pashlyer.
“Jam gati të marr borxh për t’i kthyer paratë taksistit. Drejtësia të marrë parasysh gjendjen ekonomike. Nuk kam asnjë lek në shtëpi. Nuk kam para as për të udhëtuar për të takuar djalin. E di që do të dënohet, dhe nuk do jem gjallë derisa ai të dalë nga burgu”, shprehet nëna e Eduart Budinit.
Eduart Budini u arrestua dje pasi në taksinë ku ai grabiti shoferin ishte instaluar një kamera sigurie, e cila ka filmuar të gjithë momentin e ngjarjes dhe fytyrën e autorit.
Eduart Budini është punonjës i Policisë në Repartin e Forcës së Ndërhyrjes së Shpejtë të Fierit.
