Edhe mbas gati tre çerek shekulli ish-mbretëria groteske shqiptare ka nostalgjikët e saj.
Edhe mbas një çerek shekulli që është rrëzuar, komunizmi gjithashtu grotesk shqiptar ka nostalgjikët e tij.
Nostalgjia është një gjë që veç të tjerash, mund ta ketë shpjegimin tek e shkuara, e cila gjithmonë duket më e bukur se e tashmja.
Por ky është muhabet tjetër. Këto foto të kohës së demokracisë së sotme groteske shqiptare janë shkrepur një vend që bashkon tre momente: të djeshmen e largët të mbretërisë kur nisi të ndërtohet Bulevardi, të shkuarën komuniste kur bulevardit ju dha edhe qytet dhe të sotmen pothuaj demokratike, kur bulevardin tentuan ta kthejnë në identitet dhe po këerkojnë ta zgjasin deri në breg të lumit.
Njeriu që fle nën hijen e “Mbretit” nuk di asgjë nga këto. Ai thjesht fle me fatin e njeriut të vetmuar që nuk e ndreqi dot as mbretëria, as komunizmi dhe as demokracia.
Sepse ca gjëra në këtë botë janë edhe vetëm me fat! Do të ecën, nuk do, të lë në rrugë. Apo dhe në bulevard qoftë! Si një i mjerë që fle nën hijen e “Mbretit”, pa çati mbi kokë, njëlloj siç nuk pati mbretëria një të tillë për shumë kohë.
