Deklarata e shumëpritur nga dy negociatorët që vizituan sot Tiranën është bërë publike mbrëmjen e sotme nga Zyra e Bashkimit Evropian në Tiranë.
Në një qëndrim të shkurtër dhe konçiz, McAllister dhe Fleckenstein zbardhin propozimet e tyre ndërsa theksojnë se mazhoranca i pranoi pikat e marrëveshjes me kusht që PD të votonte Vettingun.
Duke u ndalur te pretendimet e PD, dy negociatorët e Parlamentit Evropian thonë se partia në fjalë nuk lëvizi nga pozicioni i saj për një qeveri teknike.
Deklarata e plotë:
Kryetari i Komisionit të Punëve të Jashtme të Parlamentit Evropian David McAllister (PPE) dhe Raportuesi për Shqipërinë i Parlamentit Evropian Knut Fleckenstein (S&D) u takuan me maxhorancën dhe opozitën dhe patën një diskutim të mirë.
Dy europarlamentarët paraqitën propozime për të ardhmen që përfshinin pika mbi dekriminalizimin, luftën kundër lëndëve narkotike, masa teknike për përmirësimin e kryerjes së zgjedhjeve, si dhe masa për ndërtimin e besimit politik.
Ata propozuan gjithashtu ide për diskutim mbi datën e zgjedhjeve dhe ndryshime të mundshme parazgjedhore në strukturat e qeverisë për të ndërtuar besim afatgjatë te sistemi.
Nga ana e maxhorancës pati dakordësi mbi pikat e propozuara me kusht që vetingu të votohet në parlament.
Partia Demokratike iu përmbajt pozicionit të saj për emërimin e një kryeministri teknik dhe miratimin e një sistemi elektronik votimi për të pasur zgjedhje të lira dhe të ndershme.
