Pavarësisht se shqiptarët nuk përfitojnë azil politik, ata përfshihen në statistikat që Franca paraqet sot. Ky është konstatimi i zv. Ministres së Punëve te Brendshme Rovena Voda, bërë në emisionin “Java në RTSH”.
Në panelin me analistët Preç Zogaj e Lorenc Vangjeli, Voda tha se qeveria shqiptare nuk pret shifra nga vendi bllokues i negociatave, por emra dhe histori konkrete azilkërkuesish, për të bërë më pas verifikimet institucionale.
Sipas zv.ministres, Franca aktualisht ka problem me legjislacionin e saj sa i përket azilantëve.
Ajo shtoi se shteti në fjalë përllogarit në statistika cilindo që aplikon për azil, pavarësisht faktit se ata nuk përfitojnë një status të tillë.
Voda shtoi në emision se bëhet fjalë vetëm për 5.800 shqiptarë që kanë aplikuar për azil dhe se ky status nuk jepet për arsye ekonomike, por nëse personi provon se është i diskriminuar për shkak të seksit, bindjeve politike dhe fesë.
Të pranishëm në emision, gazetarët Mira Kazhani dhe Aleksandër Çipa komentuan vendimin e Këshillit të Europës si dhe dhanë opinion e tyre rreth vendimit në samitin e Brukselit.
Sipas Kazhanit, Franca problemin kryesor e ka me emigrantët që vijnë nga ish-kolonitë e saj.
“Sado realiste të jetë deklarata e Macron, shqiptarët nuk janë një kërcënim për Francën. Politika e Macron është arrogante edhe me vendet fqinje të Francës, dhe jo vetëm me Shqipërinë”- tha Kazhani në studion e emisionit “Java në RTSH”.
Ndërkohë që sipas Aleksandër Çipës, Franca është e shqetësuar për emigrimin e shqiptarëve kryesisht.
“Duhet pranuar se vendi ynë është përfshirë në disa kriza dhe depresion dhe ndjej keqardhje që mungon debati për një çështje të tillë” – tha Çipa.
Ai shtoi se qytetet e tjera përveç Tiranës, nuk e kanë fituar betejën me kohën duke qenë pa energji dhe pa jetë. Çipa komentoi edhe emigrimin në BE duke e ndarë në dy kategori.
“Ka tre vendburime emigrantësh në Francë dhe në vende të tjera. Shqiptarë nga Shqipëria dhe shqiptarë nga Greqia përshembull, që kanë përfunduar dokumentacionin dhe jetojnë në një vend tjetër të BE. Gjatë kohës aty përfor dokumentacionin e dytë që ka përfituar ndaj është e vështirë për të bërë dallimin” – tha Çipa.
