Zv.kryeministri i Maqedonisë së Veriut, Bujar Osmani i cili ndodhet në Berlin në pritje të vendimit të Bundestagut pro hapjes së negociatave të Shqipërisë dhe Maqedonisë së Veriut me BE-në, tha në një intervistë për “DW”, se kushtet e vendosura për vendin tonë nuk duhet të shihen si pengesë.
Ai deklaroi se surprizat përtej pritshmërive për të dyja vendet në Bundestag do të ishin një eksperiment i rrezikshëm për të gjithë rajonin.
“Unë mendoj që Shqipëria dhe Maqedonia të dyja duhet të marrin dritë jeshile për çeljen e bisedimeve, për shkak se KE ka konstatuar se i plotësojnë kushtet. Mendoj se nëse të dyja do të fillojnë bisedimet do i jepet një dinamikë e re rajonit”, theksoi Osmani.
“Kushtet brenda kornizës nuk janë të dëmshëm për secilin vend. Qoftë për ne, qoftë për Shqipërinë. Ato na nxisin më tutje për të punuar. Ajo çfarë është rrezik është nëse do të ofrohen alternativa me të cilat do të thyhet korniza dhe do të krijohen parakorniza si dhoma pritjeje para fillimit të bisedimeve. Unë mendoj që do të konsiderohet si eksperiment i rrezikshëm për rajonin dhe do të ndikonte dukshëm në besueshmërinë e njerëzve ndaj BE-së”, tha Osmani.
Zv.kryeministri Osmani e konsideroi vendimin ne BE-së në tetor si një kthesë historike për vendin dhe si një proces që do të përshpejtojë përmbushjen e reformave.
/a.r
