Kreu i grupit parlamentar të PS-së Taulant Balla ka sulmuar kryetarin e opozitës, Lulzim Basha në lidhje me qëndrimin e këtij të fundit për vendimin e grupeve Parlamentare CDU-CSU dhe SPD, të cilat votuan sot rezolutën që t’i rekomandohet qeverisë federale hapja e negociatave me kushte për Shqipërinë.
Në një lidhje telefonike për ‘News24’ Balla, teksa ndodhet në Gjermani në pritje të marrjes së vendimit final nga qeveria gjermane për votën pro për negociatat, tha se PD dhe Basha do të lëshojnë dritë hije edhe atje ku dielli është i qartë. Mes të tjerash ai tha se lideri i opozitës ka hedhur baltë dhe ka shkruar e-maile për të penguar vendimin për çeljen e negociatave.
“Unë nuk besoj se ka ndonjë shqiptar që nuk ka pritur që në cdo rast, edhe kur ‘Po-ja’ që është e qartë si drita e diellit, që Lulzim Basha do të lëshojë ndonjë dritë hije. Për mua dhe çdo shqiptar tjetër që di të kuptojë se PD dhe Basha kanë bërë gjithçka kanë mundur për të penguar këtë vendim. Unë po flas nga ajo çka di se sa baltë është hedhur përkundrejt Shqipërisë nga goja dhe nga e-mailet e Lulzim Bashës për të penguar këtë vendim. Por po-ja është po dhe nuk ka nevojë për komente”, -tha Balla.
Socialisti tha se sjellja e deri tanishme e opozitës ka qenë dëmtuese përkundër interesave integruese të Shqipërisë.
“Unë e kam lexuar me kujdes dokumentin dhe ligjvënësit gjermanë janë të kujdesshëm që të respektojnë kontekstet dhe që në çdo vend palët të marrin përgjegjësinë që iu takon. Sjellja e deri tanishme e opozitës në Shqipëri padyshim që ka qenë dëmtuese përkundër interesave integruese të Shqipërisë dhe gjendet mundësia për t’u bërë apel që institucionet janë të rëndësishme dhe kush largohet nuk gjen mbështetje. Për mua është një ‘Po’ historike po të kemi parasysh rrugën nëpër të cilën ka kaluar kjo vendimmarrje. Jam shpresë plotë që më 17-tetor qoftë Shqipëria qoftë Maqedonia e Veriut do të marrin autorizimin zyrtar për të filluar procesin e hapjes së negociatave për anëtarësim”, pohoi ai.
