Kryeministri britanik, Boris Johnson i është nënshtruar një kujdesi të shkëlqyer dhe është në duar të sigurta në spitalin Saint Thomas në Londër, pasi gjendja e tij në lidhje me infeksionin e koronavirusit u përkeqësua, deklaroi dje në mbrëmje, ministri i Jashtëm britanik Dominic Raab, i cili sapo mori përsipër detyrën si kreu i qeverisë.
”Vendi dhe qeveria janë absolutisht nën kontroll”, theksoi ai.
”Kemi një frymë të fortë ekipi të qeverisë për të zbatuar udhëzimet e Johnsonit dhe për të mposhtur këtë virus të tmerrshëm”, tha Raab.
Kryeministri britanik, Boris Johnson, 55 vjeç, i cili rezultoi pozitiv për koronavirusin e ri 10 ditë më parë, u transferua në kujdes intensiv, sot, pas shtrimit në spital në Londrën Qendrore, tha zëdhënësi i tij.
“Gjatë pasdites, gjendja shëndetësore e kryeministrit u përkeqësua dhe, me këshillën e ekipit të tij mjekësor, ai u transferua në njësinë e kujdesit intensiv të spitalit”, tha zyrtari.
“Kryeministri i kërkoi ministrit të Jashtëm Dominic Raab (…) ta zëvendësojë atë kur është e nevojshme”, shtoi ai në një deklaratë. /e.s/
