Shqipëria është shndërruar në një destinacion të rëndësishëm për të huajt që duan të kryejnë një ndërhyrje estetike. Kjo formë e turizmit po tërheq shumë jo vetëm emigrantët shqiptarë, por edhe të huajt listën e të cilëve e kryesojnë italianët.
Vilma Dulja, e cila administron një agjenci për turizmin mjekësor, thotë se bashkë me pushimet klientët marrin edhe këto shërbime mjekësore me çmim dhe cilësi të mirë.
Pas ndërhyrjeve dentare, interes të lartë kanë për rimodelim të hundës apo veshëve. Gjithashtu edhe klinikat për mbjelljen e flokëve kanë pasur një fluks të shtuar të pacienteve, kryesisht italianë.
Mjeku Fatjon Gjoka thotë se të rinjtë janë ata të cilët kanë më shumë interes për të mbjellë flokët, por nuk mungojnë as ata mbi 60 vjeç.
Sipas të dhënave të INSTAT nga janari në qershor, 430 shtetas kanë hyrë në Shqipëri për të marrë trajtim mjekësor, por jo të gjithë ata që vizitojnë vendin tonë deklarojnë arsyen e vizitës, ndaj kjo shifër duhet marrë me shumë rezerva dhe situate në terren është ndryshe, me fluks shumë herë më të lartë.
/a.r
