Rithemelimi dhe Partia e Lirisë do të zhvillojnë ditën e sotme protestën e radhës përpara bashkisë së Tiranës.
Që prej publikimit të dosjes 5D përpara bashkisë janë organizuar protesta të shpeshta ku tema kryesore e tyre ka qenë dorëheqja e Erion Veliajt.
Duke u nisur nga ngjarjet e fundit ku pati djegie gomash dhe hedhje sendesh të forta në drejtim të forcave të rendit dhe godinës, policia e shtetit ka ndërmarrë një plan masash për mbarëvajtjen e këtij tubimi.
Prej orës 09:30 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Për këtë arsye sugjerohen që të përdoren rrugë alternative, deri në përfundim të tubimit, si Unaza e Mesme dhe Unaza e Madhe.
“Gjatë disa tubimeve të mëparshme, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë dhe vetë pjesëmarrësve në tubime. Policia u përsërit thirrjen organizatorëve, drejtuesve dhe pjesëmarrësve në tubime për të respektuar ligjin dhe për t’u distancuar nga çdo akt dhune”, thuhet në njoftimin e Policisë.
/a.r
