Në listat e kandidatëve të Partisë Demokratike janë 7 kandidatë me të shkuar kriminale. Deklarata është bërë nga nënkryetari i grupit parlamentar të Partisë Socialiste Taulant Balla në mbledhjen e sotme të Komisionit të Posaçëm për Dekriminalizimin.
Në fjalën e tij Balla tha se 7 nga emrat e kandidatëve të PD për zgjedhjet vendore rezultojnë me të shkuar kriminale, por pa bërë të ditur emrat. Ai tha se i ka dërguar një material Prokurorisë së Përgjithshme.
“Ne kemi 7 emra të kandidaturave tuaj me të kaluar krimnale, por nuk po i them sot. Ne duam ta lexojmë projekt-ligjin dhe në një kohë urgjente të ulemi sërish të diskutojmë. Ne do shqyrtojmë propozimin e Partisë Demokratike, menjëherë. Përfitoj nga rasti që edhe koalicionit tuaj, si e ka emrin, ta konkretizojë këtë proçes me emra konkretë për të mos kandiduar elementë me rekorde kriminale. Besoj që në politikë me rëndësi është vullneti politik. Besoj se në qershor do bëhen rregullimet e përkohshme. Unë shpresoj që PD-ja do reflektojë në këtë drejtim, ne do jemi mekanizëm pozitiv” tha Balla.
Ndërkohë nga ana e tij, Kreu i Komisionit për Dekriminalizimin Oerd Bylykbashi tha se është kërkuar asistencë nga ndërkombëtarë dhe se tashmë pritet përgjigjja.
Bylykbashi tha se është propozuar një projektligj për kandidatët në mënyrë që të pengohet kandidimi i të inkriminuarve dhe në zgjedhjet lokale të 21 qershorit.
“Kërkuam asistencë nga ndërkombëtarët, jemi në pritje të përgjigjes për shkresën e dërguar. Dekriminalizimi, propozuam projektligj për kandidatët. Ky ligj do pengojë kandidimin e të inkriminuarve”, tha Bylykbashi.
Deklaratat e sotme në Komisionin për Dekriminalizimin, erdhi pas shqetësimit të ngritur nga SHBA përmes ambasadorit Donald Lu i cili theksoi se në listat e kandidatëve ka disa persona me të shkuar kriminale.
Redaksia Online
(Javanews.al)
