Policia vijon kërkimet për të shumëkërkuarin Talo Çela. Dyshimet janë se ai fshihet në qarkun e Elbasanit prandaj policia prej 3 ditësh po vijon bastisjen dhe kontrollet.
Ora News mëson se policia është vendosur në pikat hyrëse dhe dalëse të qytetit të Elbasanit dhe po ushtrohen kontrolle në mënyrë të imtësishme në automjetet që lëvizin në këto akse.
Elbasani është një nga qarqet më problematike për kriminalitetin në vend, për shkak të grupeve që kalojnë aty por edhe të vrasjeve të pazbardhura që kanë ndodhur në qytet vitet e fundit.
Gjithashtu, pas informacioneve në rrugë operative, prej tre ditësh janë zhvilluar kontrolle të shumta në qytetin e Peqinit. Janë bastisur disa shtëpi dhe objekte ku dyshohej se fshihej shtetasi Talo Çela.
Pas dëshmisë së dhënë nga i penduari Nuredin Dumani i cili pas arrestimit më 30 mars të këtij viti zbardhi një serish krimesh në Tiranë, Durrës dhe Elbasan, policia ka kryer disa kontrolle për kapjen e Talo Çelës por të gjitha kanë dështuar pavarësisht angazhimit të efektivave nga Tirana. Ndërkohë më 19 maj 2022 SPAK firmosi urdhërarrest ndaj Talo Çelës në kuadër të operacionit “Plumbi i artë” ku u firmosen 32 urdhërarreste dhe u ekzekutuan 18prej tyre.
Operacioni i fundit për kapjen e Talo Celes që u ndërmor në korrik u zhvillua ne Belsh dhe Cërrik, por dështoi.
/s.f
