Ambasadorët e QUINT-it zhvilluan një takim përreth dy orë me kryeministrin e Kosovës, Albin Kurti.
Nuk dihet tema kryesore e bisedës së zhvilluar në ndërtesën e qeverisë në Prishtinë, por mendohet se ka qenë lidhur me uljen e tensioneve në veri të Kosovës, por ndoshta edhe një diskutim i raportit të zyrtarëve europianë Lajçak-Borrell për situatën në rajon.
Ajo që ra në sy ishte përfaqësimi i Shteteve të Bashkuara të Amerikës në nivel zëvendës ambasadori, pasi në takimin me Kurtin nuk ishte i pranishëm zoti Jeffrey Hovenier.
Pas përfundimit të takimit, përfaqësuesit diplomatik të SHBA-ve, Francës, Italisë, Gjermanisë dhe Britanisë së Madhe nuk u prononcuan për mediat.
Ky zhvillim vjen pasi ambasadorët e QUINT-it nuk morën pjesë në pritjen shtetërore të organizuar nga kryeministria, presidenca dhe kuvendi ne 24 vjetorin të çlirimit të Kosovës.
Nga zyra e presidentes Vjosa Osmani sqaruan se nuk bëhet fjalë për bojkot nga ana e ndërkombëtarëve, pasi vendet e QUINT-it në atë event u përfaqësuan nga zëvendësambasadorët.
/a.r
