Kur foli për dy ndasitë që sipas tij e kanë përçarë Shqipërinë që prej luftës, Kryeministri Edi Rama u ndal edhe tek Bashkim Fino, i cili u nda nga jeta pak kohë më parë. Në fjalimin e tij të fitores në sheshin Skënderbej, Rama e mori atë si shembull kur partitë politike lanë mënjanë ndasitë dhe u bashkuan për t’i dhënë atij lamtumirën e fundit.
“Këtu sot mungon edhe dikush që punoi për këtë fitore, miku ynë i shtrenjtë Bashkim Fino. E imagjinoj duke qeshur atje lart dhe duke duartrokitur këtu bashkë me ne, për fitoren tonë të mrekullueshme. Por u desh të ikte nga kjo botë, Bashkimi ynë i dashur që të tërë të bashkoheshim në ngushëllimet për familjen e tij dhe të kujtoheshim se vdiq një shqiptar i mirë, jo thjeshtë një socialit i patundur. E pra ndasia e tmerrshme, mallkimi i të shkuarës nuk na ka lejuar kurrë tash 30 vjet që në skenën e politikës t’i kemi të shumta, në tërë ato ditë të panumërta që kemi ndarë së bashku, ato ditë kur jemi së pari njerëz e shqiptarë, në të gjallë, veç në ditët e zeza kemi mundur ta harrojmë për një çast se nëna nuk ka bërë me fanellë partie dhe se kjo jetë i jepet njeriu nga zoti për të zbutur dhe kafshët, jo për t’u bërë ujq për njëri-tjetrin”.
/a.r
