Këngëtarja dhe aktorja e njohur, Justina Aliaj, rikthehet sërish në ekranin e News24, me një tjetër rrëfim për jetën e saj artistike të periudhës komuniste.
Në emisionin “Kjo Javë”, aktorja u pyet nga gazetarja Nisida Tufa për deklaratën e saj të bërë pak vite më parë në News24 për ngacmimet seksuale të artistëve.
Në intervistën e para disa viteve, e pyetur nëse kishte ngacmime seksuale në komunizëm, ajo u përgjigj: “Po, kishte. Madje, kur flisnim ngushtë me dy-tri shoqe që kishim, thoshin se “e kanë për detyrë”. Ishte e dhimbshme, por secili din vetë çfarë bën dhe e ka për vete gjithsekush. O Zot i madh! Normal që kam refuzuar. Unë s’kisha nevojë asgjë prej tyre, sepse në radhë të parë është gjaku që nuk shprishet dhe në radhë të dytë, kisha aftësitë e mia dhe nuk doja asnjë lloj ndihme veç t’më linin të hypja në skenë dhe në skenë unë nuk hypa për 18 vite”.
Por, ja çfarë tha sot në “Kjo Javë” aktorja për këtë temë:
Ju keni folur dhe për ngacmime…
Nuk më pëlqen të flas për këtë, sepse është një gjë që do t’i vijë radha t’i them dhe më vjen jashtëzakonisht keq që shtrembërohen. Ata e dinë mirë çfarë kanë bërë me këtë intervistë, unë nuk flas kështu, merrni e shiheni të gjithë intervistën.
Është momenti për ta sqaruar…
Jo, preferoj ta mbaj. Ata e dinë mirë, ata le të dridhen, unë i shoh në sy, ata jo, se kanë gënjyer nga fillimi në mbarim.
Për kë e keni fjalën?
Ata që më intervistuan. E kanë bërë mëkatin te dera e Kishës, isha në Kish, po mbaja koncert. Aty e kanë bërë mëkatin, Kisha dhe Xhamia i sheh, s’ka problem.
A ishin atëherë artistët apo këngëtaret të preferuara, persona që mbahej fokusi tek ato?
Jetët tona bashkoheshin vetëm në festival, jetët tona ishin të ndarë komplet. Ata që kisha dëshirë me i pas shokë e shoqe i kisha, por ishin shumë të rrallë, sepse shumë të rralla takimet. Unë isha në teatër, aktore, këngëtare, në televizion. Isha e shkëputur, ku ishin të tjerët, një në Sarandë, një në Korçë..
Përveç Sherif Merdanit, që iu e kujtoni me nostalgji miqësinë tuaj, kush tjetër hynte te miqtë tuaj?
Merdani ishte zotni. Edhe Tonin Tërshana, me Vacen kam pas marrëdhënie korrekte, me Luan Zhegun kam pas marrëdhënie shumë korrekte dhe vazhdoj t’i kem ashtu. Me Bashkim Alibalin, me Liljana Kondaktin, me Ema Qazimi, kemi shkuar dhe kemi ardhur nëpër shtëpitë tona. Jo vetëm mua më njihnin, por kur nuk isha në shtëpi, shkonin te nëna ima, kur vinte nëna të rrinte tek unë.
A ka pas këngëtarë që janë lartësuar, edhe pse nuk e meritonin?
Kjo është pyetje retorike, nuk është e re. Nuk është se nuk ka ndodhur kurrë dhe që s’do të ndodhë kurrë. Ishte parulla dhe zbatohej rreptësisht që jemi të gjithë njëlloj, por kjo nuk është fort e këndshme, se nuk jemi të gjithë njëlloj. Ti je gazetare, unë artiste e megjithatë na vënë shenjën e barazimit. Ose ti je gazetare shumë e talentuar, e unë jam me mik, por nuk jemi të barabarta, ne i kemi sytë në ballë. Po cfarë bënim ne, na mjaftonte një heshtje dhe shiheshim në sy. Unë shoh punën time, Zoti ma ka dhënë këtë aftësi dhe nuk kam nevojë për…
g.kosovari
