913 mijë të huaj më shumë hynë në vendin tonë në 5 muajt e parë të vitit, duke arritur një total prej 3.3 milionë vizitorësh. Sipas të dhënave të INSTAT, vetëm në maj Shqipërinë e vizituan rreth 1 milionë pushues më së shumti nga Evropa, por në rritje janë dhe turistët nga Amerika, Azia, Afrika, e Lindja e Mesme. Ndërsa nga ajo çfarë raportojnë bizneset dhe pikat e kalimit kufitar, edhe qershori pritet të ketë pasur të njëjtën ecuri pozitive.
“Shqipëria po kthehet në vendin më atraktiv për të gjithë. Ka disa arsye për këtë çështje por më kryesorja që po diversifikojmë ofertën turistike duke ofruar kështu një set shërbimesh”, Feriolt Ozuni, ekspert i Turizmit.
Të huajt që hynë në territorin shqiptar u rritën me 38.2% më shumë se një vit më parë. Më së shumti qëllimi i hyrjes së shtetasve është për pushime, dhe më pak për biznes. Ndërsa i lartë vijon të jetë dhe numri i turistëve tranzit.
“Me këto ritme turizmi do të rrisë ndikimin në ekonomi. Impakti do të jetë më i lartë në ekonomi edhe këtë vit duke marrë parasysh pritshmëritë për një numër më të lartë turistësh”.
Vet Ministria e Turizmit dhe Mjedisit parashikon një rritje të kontributi të Turizmit në PBB në 32% deri në 2026.
Ndërsa më shumë turistë po hyjnë në vend, akoma më shumë, nga ana tjetër edhe më shumë shqiptarë po zgjedhin të udhëtojnë drejt shteteve të tjera. Në 5 muajt e parë të vitit janë regjistruar 3 milionë dalje nga vendi, 21.6 % më shumë se e njëjta periudhë në 2023-in./a2
