Ndonëse më herët u tha se dosja “184” do t’i kalonte Prokurorisë së Posaçme Antikorrupsion, tashmë rezulton se kjo e fundit nuk ka pranuar aktet e dosjes “184” mbi dyshimet për shit-blerjen e votës në Dibër.
Mësohet se këtë të hënë, SPAK ka vendosur që dosjen e hetimit mbi shitjen dhe blerjen e votave gjatë zgjedhjeve të pjesshme në 2016 t’ia rikthejë Prokurorisë së Dibrës.
Në 21 gusht 2019 ishin Krimet e Rënda që shpallen moskompetencen për gjykimin e kësaj dosje, duke ia rikthyer çështjen Prokurorisë së Dibrës.
Tani, të njëjtën gjë e bën edhe SPAK. Në përgjimet e dala në media, të bëra në kohën që në Dibër bëheshin zgjedhjet e pjesshme lokale, dëgjoheshin zyrtarë socialistë të cilët bisedojnë me njëri-tjetrin, por edhe me personazhe me ndikim lokal në Peshkopi, duke diskutuar mbi sigurimin e votave në favor të kandidatit të mazhorancës. /e.s/
