Me ndryshimet e propozuara nga Sandër Lleshaj, të parët që do të kryejnë procesin e vetingut do të jenë punonjësit e Shërbimit për Çështjet e Brendshme dhe Ankesat, duke filluar nga drejtori, Muhamet Rrumbullaku.
Ata do të vetohen nga Komisioni i Jashtëm i Vlerësimit për të qenë të gatshëm që më tej të kryejnë verifikimin e 12 mijë punonjësve të tjerë të Policisë së Shtetit dhe Gardës së Republikës. Komisioni i Jashtëm i Vlerësimit do të verifikojë në 3 komponentë edhe 287 zyrtarët më të lartë të Policisë, që nga drejtori i Përgjithshëm i Policisë, Ardi Veliu, deri te shefat e Komisariateve.
Ky Komision, i drejtuar nga Viktor Bërdo përbëhet nga 15 anëtarë. Pesë anëtarë të këtij Komisioni janë nga ILDKPKI, pesë të tjerë nga pedagogë të Fakultetit të Drejtësisë dhe të Fakultetit të Ekonomisë të Universitetit të Tiranës, si dhe pesë të tjerë nga radhët e avokatëve.
Komisioni i Jashtëm do të vlerësojë pastërtinë e figurës, pasurinë dhe profesionalizmin për drejtuesit e lartë, nga grada “Drejtues Madhor” deri te grada “Kryekomisar”. Fillon me drejtorin e Përgjithshëm të Policisë, zv.drejtorin e Përgjithshëm, drejtuesit e Departamenteve dhe zv.drejtorët, drejtuesit e 12 Drejtorive të Policive Vendore dhe zv.drejtorët, shefat e Sektorëve dhe shefat e Komisariateve.
RELACIONI
Në relacionin që shoqëron draftin e propozuar nga Sandër Lleshaj, shpjegohet se qëllimi i këtij projektligji është të japë një kontribut në përmbushjen e objektivit të qeverisë shqiptare dhe në veçanti të Ministrisë së Brendshme në krijimin e institucioneve të forta me profesionistë me integritet.
“Vlerësimi i punonjësve, në veçanti i atyre të Policisë së Shtetit, është domosdoshmëri në kuadrin edhe të hapave të hedhura nga Reforma në Drejtësi dhe specifikisht të rivlerësimit të gjyqtarëve dhe prokurorëve, duke marrë në konsideratë rolin e rëndësishëm dhe përfshirjen e Policisë së Shtetit në hetimet ndaj veprave penale. Procesi i vlerësimit kalimtar bazohet në problemet e identifikuara nga një analizë e detajuar e situatës aktuale në Policinë e Shtetit, në Gardën e Republikës dhe në Shërbimin për Çështjet e Brendshme dhe Ankesat.
Kjo analizë mundësoi përcaktimin e objektivave specifikë, si dhe identifikimin e nevojave për ndryshime ligjore, strukturore dhe procedurale për kryerjen e kontrollit të pasurisë, të figurës dhe aftësive profesionale”, thuhet në relacion. Ndërsa sqarohet se nëpërmjet këtij procesi synohet të garantohet zbatimi i parimit të integritetit, rritja e profesionalizmit dhe garantimi i një karriere të drejtë dhe të bazuar në meritokraci, duke krijuar kështu institucione të forta dhe të besueshme, me profesionistë me integritet.
NDRYSHIMET
Nëpërmjet ndryshimeve të propozuara, synohet që të ulen kostot e procesit, të shpejtohet koha e shqyrtimit të rasteve individuale dhe të garantohet një standard uniform vlerësimi në fazën e dytë dhe të tretë pa prekur paanshmërinë, pavarësinë, objektivitetin dhe përputhjen e procesit të vlerësimit me parametrat e procesit të rregullt ligjor.
Ndryshimi i parë thelbësor është fakti se propozohet që punonjësit e SHÇBA-së të kalojnë të gjithë vlerësimin në fazën parë. Sot, ligji në fuqi parashikon që vetëm drejtori i Përgjithshëm, zëvendësdrejtori, drejtorët dhe shefat e Sektorëve e Komisariateve e kalonin vlerësimin në fazën e parë. Vlerësimi i fazës së parë kryhet nga një Komision i Jashtëm me 15 anëtarë, i asistuar nga një Sekretariat Teknik me po 15 anëtarë.
