Kalaja e Tiranës do të rikonstruktohet më tej. Qeveria ka vendosur të ndryshojë disa nene të ligjit për Kalanë, e cila është shpallur “Zonë Arkeologjike A”. Në ligjin e miratuar në vitin 2009, shtohet edhe një pikë, e cila parashikon rrethimin e zonës.
“Vendosja e konstruksioneve të lehta (dru, xham, plastikë, metal), me lartësi maksimale 1 kat, të cilat duhen realizuar larg mureve dhe strukturave të tjera të dallueshme apo të supozuara.
Konstruksionet, në funksion të ruajtjes, ekspozimit, informimit publik, që lidhen me veprimtarinë arkeologjike, në veçanti, dhe trashëgiminë kulturore, në përgjithësi, si dhe nevoja të tjera të rikualifikimit urban të zonës, duhet të jenë të lëvizshme (të çmontueshme) dhe, në asnjë rast, nuk duhet të dëmtojnë nëntokën dhe peizazhin.
Projekti miratohet nga Këshilli Kombëtar i Arkeologjisë dhe Këshilli Kombëtar i Restaurimeve dhe, për çdo rast, duhet të përcaktojë qartë qëllimin, kohëzgjatjen, vendndodhjen e strukturës brenda zonës si dhe planprojektin e saj. Vendosja e tyre bëhet me mbikëqyrjen e autoriteteve të specializuara shtetërore”, thuhet në pikën 4 të vendimit.