Një projektligj i përcjellë për shqyrtim në parlament parashikon forcimin e kritereve për pajisjen me leje të përhershme qëndrimi për biznesmenët e huaj që investojnë në Shqipëri.
Ndryshimet në ligjin “Për të huajt”, të propozuara nga Ministria e Brendshme, përcaktojnë se një biznesmen i huaj mund ta përfitojë lejen e përhershme të qëndrimit në Shqipëri vetëm nëse ka investuar të paktën dy milionë euro dhe ka hapur minimalisht 100 vende të reja pune.
Në ligjin aktual, shuma e kërkuar e investimit ka qënë një milion euro, ndërsa numri i vendeve të punës vetëm 10 vetë.
“Pajiset me leje të përhershme qëndrimi i huaji, familjarët e tij dhe personeli i tij kyç, i cili ka kryer një investim në Republikën e Shqipërisë, në sektorë strategjikë, në vlerën jo më pak se 2 milionë euro dhe dokumenton se ka krijuar mbi 100 vende pune, minimalisht për një periudhë 1-vjeçare”, citohet neni 18 i draftit.
Po ashtu, ligji i ri ‘Për të huajt” krijon për herë të parë mundësinë që profesionistët e huaj të pavarur të ofrojnë shërbime në Shqipëri. Këta janë personat fizikë, të regjistruar si të vetëpunësuar jashtë territorit të Republikës së Shqipërisë, por që kanë një kontratë për ofrimin e shërbimeve me një përfitues në Shqipëri.
Një tjetër ndërhyrje në ligjin bazë për të huajt është ai që heq tarifën prej 10 mijë lekësh për studentët me përkatësi etnike shqiptare, të cilët kryejnë studimet në Shqipëri. Kjo sipas qeverisë do të ndikojë pozitivisht në rritjen e mundësive për shtetasit me përkatësi etnike shqiptare në vendet fqinje dhe shtetasit e Republikës së Kosovës, për ndjekjen e studimeve në gjuhën shqipe pranë institucioneve arsimore shqiptare. (java /r.a)
