Projektligj për disa ndryshime në “Kodin Penal të Republikës së Shqipërisë”, të ndryshuar do të diskutohet sot në Kuvend për t’u hedhur më pas në votim.
Në lidhje me këtë projektligj, deputetja demokrate Jorida Tabaku në një deklaratë për media jashtë Parlamentit, deklaroi se liria e fjalës dhe gazetarët janë në rrezik për kërcënime. Sipas saj, Kodi Penal do të përdoret nga qeveria si kërcënim ndaj gazetarëve dhe fjalës së lirë.
Ajo theksoi se PD-ja kërkoi ndryshim të nenit 119-të dhe 120-të, përkatësisht të fyerjes dhe shpifjes, por mazhoranca, sipas saj, propozoi një tjetër draft i cili të mos e prekte nenin 119-të dhe nenin 120-të ta prekte pjesërisht për përcaktimin e individëve që do të jenë jashtë veprave të Kodit Penal”
“Ka sot media në Shqipëri që kanë gazetarët, organizatat vullnetare të gazetarëve, sidomos atyre të terrenit. Pak më parë ka pasur një protestë të tyre, ka pasur një proces të gjatë konsultimesh me gjithë gazetarët për të arriture në një draft të kodit penal i propozuar nga PD dhe mbante firmën time. Cilat janë shqetësimet kryesore?
Sot liria e fjalës është në rrezik, qeveria mazhoranca pushteti e përdor padinë penale si kërcënim ndaj gazetarëve, ndaj fjalës së lirë. Prandaj pas një procesi të gjatë konsultimesh 2 mujor, ne propozuam një draft të Kodit Penal i cili kishte shfuqizimin e plotë të nenit 119 dhe 120, që janë specifikisht neni për fyerjen dhe neni për shpifjen.
Jo vetëm për gazetarët, por për të gjithë qytetarët e Republikës së Shqipërisë.
Qeveria shqiptare shkoi për një draft tjetër, qeveria shqiptare vendosi që nenin 119, pra fyerjen, të mos e prekë. Ndërkohë që neni 120 ta prekë pjesërisht dhe të përcaktojë grupin e individëve që do të jenë jashtë veprave të Kodit Penal, pra jashtë kërcënimit me burg”, deklaroi Tabaku.
Deputetja sqaroi se sot në Shqipëri ka zero gazetarë teë regjistruar si të vetërregulluar në organizata apo në Qendrën Kombëtare të Biznesit, që do të thotë se Kodi Penal do të përdoret si kërcënim ndaj gazetarëve. Ajo theksoi se fjalës së lirë nuk mund ti vësh pranga.
“Të gjithë ata gazetarë që janë të regjistruar si të vetërregulluar në organizata, në qendrën kombëtare të biznesit, të njohura si të tilla. Në Shqipëri ka zero organizata të tilla, që do të thotë se Kodi Penal do të përdoret si kërcënim ndaj gazetarëve për të seleksionuar ata gazetarë që do ti kërcënojë me burg dhe ato të tjerët që do ti lejojë të fyejnë, intimidojnë e shpifin.
Si një masë për të treguar se fjala e lirë nuk kërcënohet me burg. Fjalës së lirë nuk mund ti vësh pranga. Sigurisht që ka masa, në kodin civil si në të gjitha vendet e tjera europiane nëse ekziston fyerja dhe shpifja”, deklaroi Tabaku.
