Ndryshimet kushtetuese, Mediu kërkon “ndihmë” nga Meta: Mos harro betimin që bëre në shesh

Ndezjen e dritës jeshile nga ana e mazhorancës për ndryshimet kushtetuese, Kryetari i Partisë Republikane, Fatmir Mediu e cilëson tentativë të Kryeministrit Rama për të vjedhur votat e opozitës në zgjedhje. Mediu thotë se truku i ndjekur përmes heqjes së koalicioneve është antikushtetues dhe çon drejt asgjësimit të djathtën.

“Heqja e mundësisë për koalicione, rritja e pragut elektoral është antikushtetuese, apolitike dhe antieuropiane. Ajo lojë që po bëhet është që minimalisht t’i hiqen mbi 200 mijë vota të djathtës, apo opozitës, për t’i përfituar Edi Rama me dyfish”.

Ndonëse që në krye të herës i ka mëshuar idesë se në marrëveshjen e 5 Qershorit duhet të ishte përfshirë edhe qeveria kujdestare, me vendimmarrjen e mazhorancës në Komisionin e Ligjeve, thotë se dokumenti i dakordësuar nga ndërkombëtarët tashmë ka rënë.

“Dhe nëqoftëse dilet nga kjo është një shkelje flagrante, jo vetëm thjesht e marrëdhënies me opozitën, por me qytetarët shqiptarë dhe me faktorin ndërkombëtar. Sekretari i shtetit Pompeu ka kërkuar kodifikimin sa më shpejt të marrëveshjes, por Edi Rama nga një marrëveshje politike do ta shndërrojë në një marrëveshje teknike. Kjo është e papranueshme”.

Përballë asaj që e cilëson si shkelje flagrante të Kushtetutës, kreut të opozitës i kërkon të reagojë sa nuk është vonë, ndërsa Presidentit Meta i kujton betimin e bërë në 2 Mars.

“Detyra e veprimit politik të opozitës është të zgjojë qytetarët për këtë që po ndodh, jo pasi të ketë ndodhur. Pasi të ketë ndodhur nuk do të jetë produktive. Edhe Presidenti i Republikës ka marrë një qëndrim solemn në shesh, përballë qytetarëve që nuk do të lejojë shkelje të kushtetutës dhe Presidenti duhet të marrë qëndrimin e vet”.

Mediu thotë se opozita ka informuar partnerët strategjik për këtë akt të paprecedentë, që sipas tij, acaron më tej klimën politike në vend dhe e fut Shqipërinë në një kurs zhvillimesh të paparashikueshme.

/a.r