Kryesia e Partisë Socialiste ka bërë disa ndryshime të drejtuesve politikë të saj në qarqe. Ministrja e Mbrojtjes, Olta Xhaçka, do të drejtojë qarkun e Dibrës, i cili në zgjedhjet parlamentare të 2017, u drejtua nga Ilir Beqja.
Ish-ministri i Shëndetësisë do të drejtojë qarkun e Kukësit, qark, të cilin e drejtoi deri pak muaj para zgjedhjeve të 25 qershorit për t’ia lënë më pas ish-ministres së Mbrojtjes, Mimi Kodheli, shkruan “Panorama”.
Por në qarkun e Kukësit është bërë një riorganizim i ri, Bashkia Kukës do të drejtohet nga Safet Gjici, president i Klubit sportiv “Kukësi” dhe ish-kandidat për kryetar bashkie në Kamzë. Vendin e Saimir Tahirit, si drejtues politik i qarkut të Tiranës, e ka zënë Blerina Gjylameti, e cila aktualisht është dhe kryetare e Degës Socialiste të Tiranës.
Në mbledhjen e fundit të Asamblesë Kombëtare, sekretari i Përgjithshëm, Taulant Balla, u shpreh i pakënaqur nga puna e drejtuesve politikë të qarqeve, veçanërisht për procesin e zgjedhjeve në parti. Ai u kërkoi ministrave të zgjedhin mes drejtuesit politik të qarkut dhe postit të ministrit, nëse nuk i mbajnë dot të dyja detyrat.
“Përgjegjësia individuale bie mbi çdokënd që nuk e ka bërë detyrën, por ajo politike bie në radhë të parë mbi drejtuesit politikë të qarqeve, të cilët e kanë toleruar në përditshmërinë e punës së tyre këtë dobësi të rëndë dhe nuk i kanë qëndruar mbi kokë procesit me rigorozitetin e nevojshëm. Dhe këtu më duhet të ripërsëris kryetarin e partisë, për ata kolegë drejtues qarqesh, që janë edhe ministra sepse ata kanë edhe barrën më të madhe dhe në njëfarë mënyre edhe hapë- sirën më të madhe për justifikime.
Përgjegjësia e drejtimit politik dhe angazhimi partiak në qarkun përkatës është prioritare dhe nuk mund të bjerë si rezultat i ngarkesave të tjera, sepse ka kosto të madhe për integritetin e marrëdhënies së shumicës sonë qeverisëse me popullin”, tha Balla në mbledhjen e Asamblesë Kombëtare.
Ai premtoi për një analizë të plotë të punës së drejtuesve politikë të PS-së në qarqe. “Në Axhendën Vjetore Organizative të Partisë është përcaktuar qartë se korrektimi i segmenteve të procesit zgjedhor dhe kritereve që nuk janë respektuar, duhet të realizohet brenda muajit shkurt 2018”, tha Balla.
DREJTUESIT E PS NE QARQE
Qarku Tiranë Blerina Gjylameti
Qarku Kukës Ilir Beqja
Qarku Shkodër Ditmir Bushati
Qarku Dibër Olta Xhaçka
Qarku Lezhë Lindita Nikolla
Qarku Durrës Vangjush Dako
Qarku Fier Gramoz Ruçi
Qarku Elbasan Taulant Balla
Qarku Korçë Niko Peleshi
Qarku Berat Blendi Klosi Qarku
Vlorë Damian Gjiknuri Qarku
Gjirokastër Bledi Çuçi
