Prezantimi i maketit të Teatrit të ri duket se i ka fashitur pjesërisht polemikat mes qeverisë dhe aktorëve. Por Robert Ndrenika duket se ka mbetur i mëdyshur nga ceremonia.
Në fund të fjalës së kryeministrit, Robert Ndrenika kërkoi fjalën.
Por Rama nuk e lejoi të flasë duke i kërkuar që më parë të shohë prezantimin e projektit.
“Jo jo, prit shiko projektin njëherë”.
“Mirë dakord po shoh projektin”, i është përgjigjur pa mikrofon aktori i madh.
Por, pasi prezantimi i projektit të arkitektit danez Bjarke Ingels përfundoi, e mori përsëri fjalën Rama i cili tha:
“Unë po largohem tani diskutoni me njëri- tjetrin”.
Ndrenika tha se nuk ishte lejuar të ndërhynte për të pyetur, edhe pse nga kamerat kjo ishte e pamundur të fokusohej për shkak se aktiviteti ishte me regji qendrore.
Duke folur për mediat pas takimit, Ndrenika bëri ironi me ftesën e Ramës.
“Kryeministri nuk na donte se kështu na kishin thënë, por rezulton se na dashka”, tha më pas Ndrenika.
“Më shqetëson Partneriteti-Publik-Privat. Kjo është dyndje e xhunglës urbane.
Por unë dua ta shoh në maket, për të parë nga afër si është skena dhe xhepat e saj.
Ajo që na intereson ne artistëve”, deklaroi aktori, një nga zërat kundër prishjes së teatrit aktual.(TemA)
