Në një kohë kur aksioni në Kumanovë mbetet ende i paqartë ashtu si edhe viktimat e shkaktuara nga ky sulm, një nga pjesëtarët e grupit të armatosur, Sulejman Osmani, i njohur si “Sula”, i cili ka mundur ti shpëtzojë policisë maqedonase, tha se tre nga kosovarët e shpallur të vdekur, ishin kapur të gjallë ngapolicia.
Në një intervistë për gazetën “Zëri”, Sulejman Osmani shprehet se Xhafer Zymberi, Mirsad Ndrecaj dhe Muhamed Krasniqi, i njohur si Malisheva, janë kapur të gjallë nga policia maqedonase.
“E di që Xhafa, Nato dhe Malisheva kanë qenë të plagosur, por janë kapur të gjallë nga policia. Më pastaj se çfarë ka ndodhur nuk e di, sepse policia maqedonase ka bërë shpërndarjen e grupit”, ka thënë Osmani, për të cilin mediet kanë raportuar se ishte ai që ka treguar vendndodhjen e armatimit të grupit.
Nga ana tjetër, sipas mediave maqedonase, nuk janë 14 të vrarë në mesin e grupit të armatosur, por vetëm dhjetë prej tyre.
