Ndotja vijon përgjatë gjithë shtratit të lumit. Pas kilometra larg qytetit të Beratit në afërsi të fshatit Bilçë është vënë re ditët e fundit një ndotje e madhe në breg të lumit.
Zyrtarët vendor në dijeni të plotë të situatës pranojnë se ndotja e lumit i ka kaluar kufijtë e lejueshëm.
Për frenimin e saj, ata kërkojnë bashkëpunimin e qytetarëve, dhe paralajmërojnë gjoba dhe deri në mbylljen e bizneseve, që shkarkojnë mbetjet në lumë. Në mungesë të kontrollit të territorit nga institucionet vendore qytetarët dhe bizneset te pandërgjegjësuar për efektet e ndotjes, vazhdojnë prej më shumë se 20 vjetësh të përdorin lumin Osum si kosh mbeturinash, duke shkatërruar florën dhe faunën e tij.
Dje, kampionati Kombëtar i Rafting organizuar në qytetin e Beratit ka mbledhur qindra të rinj në brigjet e Osumit, ku nëpërmjet sportit synohet të promovohet lumi si vlerë e zonës dhe natyra në përgjithësi. Por ndotja masive vijon të jetë armiku kryesor që pengon thithjen e vizitorëve në këtë lumë.
