Nard Ndoka, kryetar i Partisë Demokristiane, në studion e “Ditarit” në A2 CNN, deklaroi se koalicioni opozitar ka rënë dakord që të dalë në zgjedhjet vendore me kandidat të përbashkët dhe po diskutohet mënyra e përzgjedhjes së këtij kandidati.
“Koalicioni opozitar po kristalizohet, janë rreth 20 parti opozitare që kanë vullnet për të qenë pjesë e koalicionit. Ndaj zotit Sali Berisha ka besim maksimal si lider i opozitës. Primaret janë të domosdoshme, që të gjejmë mënyrën që kandidatët të kenë mbështetjen maksimale nga faktori politik opozitar. Të gjithë jemi dakord që të mbështesim një kandidat, ndërsa mënyra e përzgjedhjes është duke u diskutuar. Por, e sigurt është që nuk do të ketë shmangie nga primaret”, tha Ndoka.
Më tej, kreu i PDK-së, foli edhe për Lulzim Bashën: “Mbetet politikani më zhgënjyes që kam njohur këto 30 vite. Për mua, është personazh “non grata” për politikën shqiptare. Një lider që jo vetëm nuk frymëzonte, por edhe dredharak dhe i pabesë. Marrëveshjen që kishte firmosur vetë me PDK-në, e zhbëri në sekondat e fundit. Nuk ishte vetëm humbja, por sjellja e Lulzim Bashës, që ishte i kapur, kishte marrëveshje të fshehta me Edi Ramën”.
/a.r
