Një nga krenaritë më të mëdha të marinës amerikane, aeroplanmbajtësja bërthamore USS Gerald R. Ford, po përballet me një problem të pazakontë, por serioz: sistemi i tualeteve në bord nuk funksionon siç duhet. Anija, e cila ka kushtuar mbi 13 miliardë dollarë dhe është 337 metra e gjatë, po has vështirësi të vazhdueshme me sistemin e kanalizimeve, duke krijuar shqetësime për rreth 4.600 personat që jetojnë dhe punojnë në të.
Problemi teknik
Që nga viti 2023 janë kryer të paktën dhjetë pastrime të thella të tubacioneve me acid, një procedurë që kushton rreth 400 mijë dollarë çdo herë dhe kërkon ndalimin e anijes në port.
Ndalimi në Kretë
Së fundmi, aeroplanmbajtësja u ndal në portin e Suda-s në Kretë, një ndalesë që ngriti pikëpyetje, pasi anija po lëvizte me shpejtësi drejt Lindjes së Mesme. Disa media sugjeruan se problemi me kanalizimet mund të ketë qenë një nga arsyet e kësaj ndalese. Porti i Sudës konsiderohet vend strategjik dhe i sigurt për operacione të tilla, duke qenë i mbrojtur natyrshëm dhe i përshtatshëm për flotat ushtarake.
Probleme të tjera të njohura
Kjo nuk është hera e parë që USS Gerald R. Ford përballet me kritika. Një raport i vitit 2020 nga Government Accountability Office evidentoi mangësi të ndryshme në projektim, përfshirë sistemin e ri të katapultave elektromagnetike për ngritjen e avionëve, që sollën vonesa dhe kosto shtesë. Sipas një hetimi të realizuar nga NPR, që nga viti 2023 janë regjistruar 42 ndërhyrje teknike për riparimin e sistemit të kanalizimeve, 12 prej të cilave gjatë misionit aktual.
Megjithatë, zyrtarët e marinës amerikane deklarojnë se këto probleme nuk ndikojnë në gatishmërinë luftarake të anijes. Sistemi i tualeteve është i ndarë në 10 zona të pavarura dhe shërben për rreth 600 kabina sanitare në 25 kuverta të anijes.
Misioni vazhdon
Aeroplanmbajtësja ishte nisur më 24 qershor nga baza e Norfolkut në Virxhinia dhe ka qëndruar në mision për një periudhë më të gjatë se zakonisht. Sipas mediave ndërkombëtare, anija mund të pozicionohet pranë Izraelit për të ofruar mbështetje në rast përshkallëzimi të tensioneve me Iranin.
Ndërsa përgatitet të rifillojë lundrimin, mbetet për t’u parë nëse “gjiganti i deteve” do të arrijë të zgjidhë përfundimisht problemin që, ndikon drejtpërdrejt në jetën e përditshme të ekuipazhit.
