Deputeti socialist Eduard Ndocaj foli në parlament për herë të parë që nga marrja e mandatit si përfaqësues i Lezhës.
Ndocaj, i etiketuar shpesh si “cowboy” për shkak të kapeles që mban, tha se e konsideron mandatin e deputetit si një mision shumë të rëndësishëm.
“Nuk ma dhatë mundësinë të flas në dy seancat e para. Nuk ka demokraci në heshtje”, tha Ndocaj në hyrje të fjalimit të tij të parë në foltoren e kuvendit.
“Po flasim prej shtatë orësh e po bëjmë ping-pong me fjalë të bukura, por ato sskanë asnjë impakt në jetën e qytaterëve, të cilët janë pa punë, pa bukë, pa drita, gjërat kryesore për të jetuar”.
Duke iu referuar debateve të ditës së sotme midis krahëve të kundërt, Ndocaj tha se janë të panevojshme. “Politika shqiptare në këto 25 vjet nuk ka vuajtur nga ndarja në krahë politikë, por ngaqë është marrë me biografi e sherre personale. Shqipëria nuk ka nevojë për to”.
Ndocaj u deklaruar kundër ndëshkimeve të rënda për biznesin, duke marrë si shembull Italinë, vendin me të cilin bën tregti e ku ka jetuar.
“Unë vij nga bota e biznesit. Në këtë moment krize botërore, biznesi ka nevojë për mbështetje e frymëmarrje, jo gjoba të kripura e burg për çdo gabim që bën. Kam 20 vite që bëj biznes në Itali, po të ishte për gabimet e bëra do ta kisha kaluar në burg gjysmën e tyre”, tha Ndocaj.
“Misioni i zhvillimit ekonomik duhet të jetë krijimi i vendeve të reja të punës dhe rritja e mirëqenies së popullit. Ndryshe, kemi dështuar në misionin e zhvillimit ekonomik të vendit”.
